പഴയ ചില ഐഫോണുകളിലും ഐപാഡുകളിലും സേവനം നിര്‍ത്തലാക്കാന്‍ ഒരുങ്ങുകയാണ് ഒടിടി പ്ലാറ്റ്‌ഫോമായ നെറ്റ്ഫ്‌ളിക്‌സ്. ഐഒഎസ് 17, ഐപാഡ് ഒഎസ് 17 ഒഎസ് അപ്‌ഡേറ്റുകള്‍ ലഭിക്കുന്ന ഐഫോണുകളിലും അതിന് ശേഷം പുറത്തിറങ്ങിയ ഫോണുകളിലുമാണ് ഇനി നെറ്റ്ഫ്‌ളിക്‌സ് സേവനം ലഭിക്കുക.
ഐഫോണ്‍ 8, ഐഫോണ്‍ 8 പ്ലസ്, ഐഫോണ്‍ ടെന്‍, ഐപാഡ് പ്രോ (ഒന്നാം തലമുറ), ഐപാഡ് (അഞ്ചാം തലമുറ) എന്നിവയെ ഈ മാറ്റം ബാധിക്കും. ഈ ഉപകരണങ്ങളില്‍ ഐഒഎസ് 16, ഐപാഡ് ഒഎസ് 16 എന്നിവയ്ക്ക് മുകളിലേക്ക് അപ്‌ഗ്രേഡ് ചെയ്യാനാവില്ല. ഈ ഉപകരണങ്ങളിലെ നെറ്റ്ഫ്‌ളിക്‌സ് ആപ്പില്‍ ഇനി അപ്‌ഡേറ്റുകളും, പുതിയ ഫീച്ചറുകളും, ബഗ് ഫിക്‌സുകളും ലഭിക്കില്ല. എങ്കിലും നിലവിലുള്ള ആപ്പ് തുടര്‍ന്നും ഉപകരണങ്ങളില്‍ പ്രവര്‍ത്തിക്കും. ഈ ഉപകരണങ്ങളില്‍ വെബ് ബ്രൗസറിലൂടെയും നെറ്റ്ഫ്‌ളിക്‌സ് ആസ്വദിക്കാനാവും.
പുതിയ സോഫ്റ്റ് വെയറുകളിലേക്ക് പ്രവര്‍ത്തനം മാറ്റുന്നതിന്റെ ഭാഗമായി ആപ്ലിക്കേഷന്‍ ഡെവലപ്പര്‍മാര്‍ സ്വീകരിക്കുന്ന സാധാരണമായ നടപടിയാണിത്. ആപ്പ് ഉപയോഗത്തിലൂടെയുള്ള അനുഭവം മെച്ചപ്പെടുത്താന്‍ ഇത് സഹായിക്കും.
നെറ്റ്ഫ്‌ളിക്‌സ് ആപ്പിന്റെ കോഡില്‍ നിന്ന് ലഭിച്ച വിവരങ്ങളെ അടിസ്ഥാനമാക്കി മാക്ക് റൂമേഴ്‌സ് ആണ് നെറ്റ്ഫ്‌ളിക്‌സിന്റെ ഈ നീക്കം ആദ്യം റിപ്പോര്‍ട്ട് ചെയ്തത്. നെറ്റ്ഫ്‌ളിക്‌സ് ഔദ്യോഗികമായി ഇത് പ്രഖ്യാപിച്ചിട്ടില്ല. താമസിയാതെ തന്നെ പ്രഖ്യാപനമുണ്ടായേക്കും. നെറ്റ്ഫ്‌ളിക്‌സ് ആപ്പിലെ അപ്‌ഡേറ്റുകള്‍ ലഭിക്കണമെങ്കില്‍ ഐഒഎസ് 17 ല്‍ പ്രവര്‍ത്തിക്കുന്ന ഫോണുകളിലേക്കെങ്കിലും ഉപഭോക്താക്കള്‍ മാറേണ്ടിവരും.
