ന്യൂഡൽഹി: പ്രമുഖ ഇ-കൊമേഴ്‌സ് പ്ലാറ്റ്‌ഫോമായ മിന്ത്രയ്ക്ക് എതിരെ എൻഫോഴ്‌സ്‌മെന്റ് ഡയറക്ടറേറ്റ് (ഇഡി) നടപടി തുടങ്ങി. വിദേശനാണ്യ നിയന്ത്രണ നിയമമായ ഫെമ (FEMA) പ്രകാരമാണ് കേസ് രജിസ്റ്റർ ചെയ്തിരിക്കുന്നത്.
ഇഡി നടത്തിയ അന്വേഷണത്തിൽ, മിന്ത്ര 1,654 കോടി രൂപയിലധികം വിലമതിക്കുന്ന വ്യത്യസ്ത ഇടപാടുകളിലൂടെ വിദേശനിക്ഷേപ നിയമങ്ങൾ ലംഘിച്ചതായി കണ്ടെത്തിയതായി റിപ്പോർട്ടുണ്ട്. മൊത്തവ്യാപാരത്തിലേക്കാണെന്ന പേരിൽ നേരിട്ടുള്ള വിദേശ നിക്ഷേപം (FDI) സ്വീകരിക്കുകയും, പിന്നീട് ഉപഭോക്താക്കളുമായി നേരിട്ട് വാണിജ്യം നടത്തുകയും ചെയ്‌തുവെന്നാണ് പ്രധാന ആരോപണം.
മിന്ത്രയുടെ സഹബന്ധമുള്ള കമ്പനിയായ വെക്ടര്‍ ഇ-കൊമേഴ്‌സ് പ്രൈവറ്റ് ലിമിറ്റഡ് വഴിയാണ് ഈ ചില്ലറ വില്പന നടന്നതെന്ന് ഇഡി കണ്ടെത്തിയിട്ടുണ്ട്. ബിസിനസ്-ടു-ബിസിനസ് (B2B)യും ബിസിനസ്-ടു-കസ്റ്റമർ (B2C) മോഡലുകളും ഒരേസമയം കയറ്റി നിയമപരമായ നിയന്ത്രണങ്ങൾ മറികടക്കാൻ ശ്രമിച്ചതായും ഇഡി ആരോപിക്കുന്നു.
2010ൽ നിലവിൽ വന്ന എഫ്ഡിഐ മാർഗ്ഗനിർദേശ പ്രകാരം, മൊത്തവ്യാപാര കമ്പനികൾ അവരുടെ വിറ്റുവരവിന്റെ 25% വരെ മാത്രമേ അനുബന്ധ ഗ്രൂപ്പ് കമ്പനികൾക്ക് നൽകാവൂ. ഈ പരിധി ലംഘിച്ചതാണ് മിന്ത്രയ്‌ക്കെതിരായ പ്രധാന ആരോപണങ്ങളിൽ ഒന്ന്.
ഇടപാടുകൾക്കും സാമ്പത്തിക രേഖകൾക്കും തുടർപരിശോധന നടക്കുന്നുണ്ടെന്നും, ആവശ്യമായ രേഖകൾ ഇഡിക്ക് ലഭിച്ചിരിക്കുകയാണെന്നും റിപ്പോർട്ടുകൾ സൂചിപ്പിക്കുന്നു.
